Në stadiumin “Fadil Vokrri” u zhvillua derbi i parë i kryeqytetit për këtë sezon, ku Prishtina triumfoi ndaj Prishtinës së Re me rezultat 2-0, duke va
Në stadiumin “Fadil Vokrri” u zhvillua derbi i parë i kryeqytetit për këtë sezon, ku Prishtina triumfoi ndaj Prishtinës së Re me rezultat 2-0, duke vazhduar marshin e saj drejt kreut të Superligës së Kosovës.
Kjo ndeshje shënoi debutimin e Shpëtim Babajt në pankinën e Prishtinës së Re, i cili mori drejtimin e ekipit pas largimit të trajnerit Elon Berisha.
Babaj, që më parë mbante postin e drejtorit sportiv, nisi aventurën e re me një sfidë të vështirë, duke e parë skuadrën e tij të mposhtur në derbi, shkruan Kërlaçki.
Prishtina kaloi në epërsi që në minutën e 17-të, kur Djordje Saletic asistoi saktë dhe Mario Ilievski shënoi me kokë për 1-0. Në pjesën e dytë, Prishtina e Re mbeti me një lojtar më pak pas ndëshkimit të Adrian Rudajt me karton të kuq (52’).
Bardhekaltërit e shfrytëzuan menjëherë avantazhin numerik dhe në minutën e 69-të Blendi Baftiu vulosi rezultatin me golin e dytë, pas asistimit të Ardian Mujës.
Në minutën e 85-të, trajneri Shpëtim Babaj i dha debutimin në Superligë djalit të tij 16-vjeçar, Aron Babaj, një moment i veçantë pavarësisht humbjes. Ai nuk kishte debutuar me trajenrin Berisha.
Tani Babaj duhet ta kërkojë fitoren diku tjetër, pasi ndeshja e parë nuk solli rezultatin pozitiv.