Kampionati Botëror i Volejbollit për Meshkuj, FIVB 2025. Bullgaria realizoi një nga përmbysjet më dramatike në historinë e volejbollit, duke mposhtur
Kampionati Botëror i Volejbollit për Meshkuj, FIVB 2025.
Bullgaria realizoi një nga përmbysjet më dramatike në historinë e volejbollit, duke mposhtur SHBA-në – ekipin mikpritës dhe të pamposhtur deri më tani – me rezultat 3-2 (21-25, 19-25, 25-17, 25-22, 15-13) në çerekfinalen e Kampionatit Botëror të Meshkujve, të zhvilluar në arenën e mbushur “Mall of Asia”.
Me një fillim të ngadaltë dhe duke humbur dy setet e para, bullgarët, të renditur të 11-tët në botë, rigjetën ritmin dhe dominuan pjesën tjetër të ndeshjes, veçanërisht në setin e pestë, ku kaluan në epërsi 6-3 dhe nuk e lanë më kontrollin e lojës.
Vendimtar ishte goditja e papritur e mesfushorit Iliya Petkov, që i dha fund një rikthimi të frikshëm të amerikanëve, të cilët kishin shpëtuar tri pikë ndeshjeje nga një disavantazh 10-14.
Bullgaria do të përballet në gjysmëfinale me Çekinë (nr. 17 në botë), e cila eliminoi Iranin me rezultat 3-1 (25-22, 25-27, 25-20, 25-21). Gjysmëfinalja tjetër do të jetë një përballje evropiane mes kampionëve në fuqi të Italisë dhe Polonisë, që mban vendin e parë në renditjen botërore.
Kjo është hera e parë që Bullgaria arrin në katërshen e fundit që nga viti 2006, kur fitoi medaljen e bronztë në Botërorin e zhvilluar në Japoni – skuadër në të cilën luante edhe Vladimir Nikolov, babai i Aleksandër dhe Simeon “Moni” Nikolov, pjesë e formacionit aktual.
Në dy edicionet e fundit të Botërorit, Bullgaria kishte zhgënjyer: e 20-ta në 2022 dhe e 11-ta në 2018, që e organizoi bashkë me Italinë.
Ylli i natës: Aleksandër “Alex” Nikolov
Vetëm 21 vjeç, Nikolov ishte lideri i padiskutueshëm i përmbysjes spektakolare. Ai realizoi 29 pikë – 26 nga sulmi, 2 ace dhe një bllok – me shtatë prej tyre vetëm në setin e pestë.
Ndihmë të çmuar dhanë edhe Asparuh Asparuhov me 12 pikë dhe Iliya Petkov me 10. Ndërkohë, organizator i lojës ishte 18-vjeçari Moni Nikolov, i cili dha plot 48 pasime (assists) dhe shënoi 5 pikë.
“Na ndihmoi pak edhe fati, nuk do ta mohoj askush. Por çelësi ishte që nuk u dorëzuam. Ishte duke u kthyer në ndeshjen më të keqe të karrierës sime… falë shokëve të jashtëzakonshëm e kthyem në një nga më të paharrueshmet”, tha Moni pas ndeshjes.
Fundi dramatik
Asparuhov e çoi ndeshjen në set të pestë me një goditje të fuqishme në fund të një serie 3-0 në setin e katërt, kur rezultati ishte barazim 22-22. Në setin final, kapitenët Aleks Grozdanov dhe Georgi Tatarov kontribuan me goditje vendimtare që e çuan Bullgarinë në avantazh 14-10.
Amerikanët, megjithatë, nuk u dorëzuan. Ata shpëtuan tri pikë ndeshjeje dhe kontestuan me sukses një bllokim të Nikolovit për shkak të një prekjeje në rrjetë. Por, në fund, ishte një manovër taktike – përdorimi i Nikolovit si mashtrim – që hapi rrugën për Petkov të mbyllte ndeshjen.
SHBA del sërish në çerekfinale
Për ekipin amerikan, Ethan Champlin (17 pikë), Jordan Ewert (15) dhe Merrick McHenry (12) nuk mjaftuan për të siguruar një vend në katërshen më të mirë. Kapiteni Micah Christenson dha 55 pasime, por as kjo nuk e shpëtoi SHBA-në nga një tjetër eliminim në çerekfinale – i dyti radhazi pas vendit të gjashtë në vitin 2022.