Kombëtarja e Çeke realizoi një rikthim të jashtëzakonshëm nga një disavantazh prej gjashtë pikësh në setin e tretë për të mbyllur me fitore 3-0 (25-19, 25-18, 25-23) ndeshjen kundër Tunizisë, duke siguruar kalimin në çerekfinalet e Kampionatit Botëror të Volejbollit për Meshkuj FIVB 2025, të martën në arenën “SM Mall of Asia” në qytetin Pasay.
Fitorja shënon arritjen më të madhe të Çekisë në një Kampionat Botëror që nga ndarja e Çekosllovakisë në Republikën Çeke dhe Sllovaki.
Që prej konkurrimit si Çeki më vete, skuadra ishte renditur në vendin e 19-të në vitin 1998, 13-ta në 2002 dhe 2006, si dhe e 10-ta në vitin 2010, përpara se të mungonte në tre edicionet e radhës.
“Është diçka e pabesueshme. Mendoj se jemi duke shkruar histori për volejbollin çek. Mund të themi se ëndrrat bëhen realitet. Jemi krenarë për veten, por ende nuk kemi përfunduar”, u shpreh Jan Galabov, i cili realizoi 13 pikë (12 nga sulmet).
Tunizia udhëhoqi deri në 16-10 në setin e tretë dhe kërkonte të shtynte ndeshjen, por Galabov, Patrik Indra dhe Lukas Vasina e ndryshuan rrjedhën e lojës, duke përmbysur gjithçka për fitoren e pastër brenda 87 minutash.
Indra ishte më i miri për Çekinë me 14 pikë, ndërsa Vasina shtoi 13 të tjera.
“Në dy setet e para e kishim ndeshjen nën kontroll, por më pas humbëm pak përqendrimin, sidomos sepse Tunizia shërbeu shumë mirë. Megjithatë, u rikthyem, e kthyem ndeshjen në favorin tonë dhe treguam shpirtin e skuadrës. Duam të luftojmë për çdo ndeshje, dhe në fund e mbyllëm me 3-0”, shtoi Galabov.
Skuadra nga Evropa Qendrore do të përballet në çerekfinale me fituesin e përballjes Serbi-Iran. Kujtojmë se Çekia e mundi më herët Serbinë në fazën me grupe me sete 25-22, 25-23, 25-20.
Pavarësisht humbjes, Tunizia e mbyll me nder pjesëmarrjen në Botëror, duke qenë përfaqësuesja e fundit afrikane në turne.
Osama Ben Romdhane dhe Ali Bongui shënuan nga 10 pikë secili në ndeshjen e tyre të fundit në këtë kampionat.
