Pep Guardiola u shpreh i impresionuar nga performanca “jashtëzakonisht” e organizuar në mbrojtje nga Napoli me 10 lojtarë, ndërsa theksoi se do të kis
Pep Guardiola u shpreh i impresionuar nga performanca “jashtëzakonisht” e organizuar në mbrojtje nga Napoli me 10 lojtarë, ndërsa theksoi se do të kishte qenë “e pamundur” për Manchester City të fitonte trofetë e viteve të fundit pa kontributin e Kevin De Bruyne.
Napoli u gjend në vështirësi që në minutën e 21-të të sfidës në Etihad, kur Giovanni Di Lorenzo u ndëshkua me të kuq për një ndërhyrje të vonuar ndaj Erling Haaland. Skuadra e Antonio Contes rezistoi për 56 minuta nën presion konstant, derisa Haaland zhbllokoi rezultatin me një goditje me kokë, e më pas Jeremy Doku vulosi fitoren 2-0 me një aksion individual.
Guardiola: “Conte është mjeshtër i mbrojtjes”
“Antonio Conte i di shumë gjëra dhe unë nuk jam aq i aftë sa ai për të organizuar një mbrojtje të tillë me 10 lojtarë”, pranoi Guardiola për Sky Sport Italia, përcjellë Kërlaçki.
“Ata ishin të përqendruar, dyfishonin mbulimin, kultura e mbrojtjes së tyre është e jashtëzakonshme. Ne nuk luajtëm futboll të mërzitshëm, kërkuam golin gjatë gjithë kohës, por u bë më e lehtë pasi shënuam. Jemi të lumtur për fitoren, por kjo garë është e gjatë.”
Lavdërime për Haaland dhe nostalgji për De Bruyne
Guardiola vlerësoi kontributin e Haaland, i cili tashmë ka shënuar 50 gola në 49 paraqitje në Ligën e Kampionëve:
“Kur ke Haaland përpara, ekipi fiton shumë vetëbesim. E nisëm mirë këtë turne dhe i përgëzoj djemtë.”
Trajneri spanjoll nuk harroi as Kevin De Bruyne, i cili u largua nga loja pas vetëm 26 minutash për shkak të ndëshkimit me të kuq të Napolit:
“Shpresoj ta shoh sërish. Ajo që Kevin ka bërë në këto 10 vite këtu është e pakrahasueshme”, tha Guardiola.
“Pa të, nuk do të kishim fituar asgjë nga ajo që kemi fituar. E patë dashurinë që tifozët treguan për të sot. Është për të ardhur keq që nuk luajti më gjatë, por të paktën ndjeu përqafimin dhe mirënjohjen e këtij stadiumi.”