Christian Pulisic ishte vendimtar në një fitore me shumë peshë të Milanit ndaj Napolit, me kuqezinjtë që siguruan suksesin 2-1 pavarësisht se luajtën
Christian Pulisic ishte vendimtar në një fitore me shumë peshë të Milanit ndaj Napolit, me kuqezinjtë që siguruan suksesin 2-1 pavarësisht se luajtën për më shumë se 30 minuta me një lojtar më pak. Ky rezultat i bashkon kuqezinjtë me Napolin dhe Romën në kuotën e 12 pikëve në krye të renditjes së Serie A.
Fillim i zjarrtë dhe Pulisic në majë të formës
Milan e nisi ndeshjen në mënyrën më të mirë të mundshme, dhe protagonisti kryesor ishte sërish Christian Pulisic. Amerikani depërtoi pas shpinës së Marianuccit dhe shërbeu saktë për Alexis Saelemaekers, i cili realizoi që në minutën e tretë. Në krahun tjetër, Mike Maignan u tregua i gatshëm në dy raste të rrezikshme – fillimisht ndaj goditjes me kokë të Gutiérrez dhe më pas ndaj një gjuajtjeje me efekt të McTominay.
Napoli nisi të reagojë me disa tentativa të pasakta nga Pavlović dhe Anguissa, ndërsa në anën tjetër Fofana nuk arriti të konkretizonte një kundërsulm të shpejtë të Milanit. Megjithatë, mesfushori francez u shndërrua në asistues për golin e dytë: pas një kombinimi me Pavlovićin, ai asistoi Pulisicin, i cili realizoi me ndihmën e një devijimi nga Juan Jesus – goli i katërt sezonal për sulmuesin amerikan që ngjitet në krye të golashënuesve të Serie A.
Më pas, Saelemaekers provoi sërish me një goditje të fuqishme, por Meret reagoi. Në fundin e pjesës së parë, Napoli pati dy raste me Di Lorenzon dhe Anguissën, por pa sukses.
Me një lojtar më pak, Milan i qëndron presionit
Pjesa e dytë nisi keq për Milanin. Maignan grushtoi një goditje me kokë të Anguissës, por topi përfundoi te Di Lorenzo, i cili u tërhoq në zonë nga Estupiñán. Ky i fundit u ndëshkua me karton të kuq dhe Napoli fitoi penallti, të cilën Kevin De Bruyne e ktheu në gol pa gabuar.
Pulisic u zëvendësua menjëherë pas këtij momenti për të futur në lojë mbrojtësin Bartesaghi. Ndeshja mori një tjetër ritëm, me Napolin që dominoi në zotërimin e topit dhe Milanin që mbështetej te vendosmëria mbrojtëse. Di Lorenzo humbi një tjetër mundësi me kokë, ndërsa kuqezinjtë pësuan një tjetër goditje kur Tomori u detyrua të lërë fushën i dëmtuar.
Megjithatë, Milan tregoi karakter. Rabiot bllokoi një goditje të rrezikshme të Elmas, ndërsa tentativa e David Neres u devijua nga Modrić dhe përfundoi në shtyllë.
Pas shtatë minutave shtesë të mbushura me tension, kuqezinjtë ruajtën rezultatin dhe regjistruan fitoren e katërt radhazi në Serie A, duke i dhënë fund edhe një serie prej 16 ndeshjesh pa humbje të Napolit në kampionat – rekordi më i gjatë në pesë ligat më të mëdha të Europës.
Milan – Napoli 2-1